Isumat.com/ Disyembre 14, 2022
Sasampaan hin kaso nga homicide in usa nga miembro han Philippine National Police ha Southern Leyte tungod han kamatay hin usa nga suspetsado hin pangawat ha Maasin City.
Iginpahayag ni Southern Leyte PNP Provincial Director Col Hector Enage nga maatubang han nasabi nga kaso hi hi SSgt Ronald Gamayon nga nakadestino ha Maasin City Police Office. Hi Gamayon an gintutudlok nga nangastigo nga nagin rason han kamatay ni Gilbert Ranes, 34 anyos, residente han Brgy Ichon, Macrohon, So. Leyte.
Hadton Disyembre 9, 2022, hi Gamayon ug pira nga kaapi han Maasin PNP in nanginano hin insidente hin pangawat ha Brgy Mantahan han nasabi nga syudad kun diin gintutudlok hi Ranes nga nagpapaluyo han krimen.
Nadakop han mga otoridad hi Ranes, ngan dida han gumawas nga video tikang hin concerned citizen, nakit-an nga ginkastigo ni Gamayon hi Ranes. Sugad-sugad nga may ginkakaptan nga butang an pulis ngan pira ka beses nga iginmakmak ini ha ulo han biktima. Ini in natabo ha lugar han pag-aresto.
Ha usa pa nga video clip, hi Ranes in nakit-an nga gindara ngadto hin usa nga kwarto kun diin may boses nga nabati-an nga nagsering, “Tiwasan na laman ni.“
Ha post mortem examination han Maasin City Health Office, hi Ranes in namatay tungod hin severe head trauma.
Iginsumat pa ni Enage nga hi Gamayon in aada yana ha kustudiya han PNP Provincial Office ngan upat pa nga kapulisan han Maasin City in ginlaknit ha pwesto ngan maatubang hin kaso administratibo tungod hini nga panhitabo.
Igindugang pa han opisyal nga klaro nga nagsayop an mga kapulisan han ira proseso pagdakop kan Ranes.
Hapagkayana, duha nga mga indibiduwal an nagpasarig nga matestitigos hira ha korte ngan ira susuportaran an mga panhitabo nga nakit-an dida han video.
Hi Maasin City Mayor Nacional Mercado in nagpatapod nga ini nga insidente in deri na utro matatabo dida han mao nga syudad.
An mga paryente ngan mga kasangkayan ni Ranes in makusog an panawagan para makab-utan an hustisya han biktima. #
