Isumat.com/ Disyembre 14, 2022
Negatibo o waray ginpapanhipos nga iligal nga droga an mga detenido ha magkalainlain nga karsel ha Sinirangan Bisayas.
Pero kun waray droga, kadam-an naman nga gadgets ngan iba pa nga gamit nga deri angay mahisulod ha presuhan an nakuha han mga otoridad.
Dida han maagahon han Disyembre 13, 2022, nagdumara hin Operation Greyhound o “Galugad” an mga personales han Philippine National Police, Philippine Drug Enforcement Agency ngan Bureau of Jail Management and Penology ha mga presuhan ha Rehiyon Otso.
Ini in ginlalakipan han mga Provincial ngan Sub-Provincial Jails ha Samar ngan Northern Samar.
Sugad gihapon hini nga aktibidad an ginbuhat ha mga karsel ha Carigara, Hilongos ngan Baybay City, Leyte.
Dida han pag-aliskay han mga otoridad, waray iligal nga droga nga narekupo tikang han mga selda, pero nakakuha hin damo nga hinganiban sugad hin magtarom nga armas, cellphones, chargers, earphones, speakers, lighters ngan sigarilyo.
Ini nga durungan nga inspection in pakalas nga gindumara basi deri makag-andam an mga preso. #
