Isumat.com/1:35PM, July 15, 2020
Ginkikilala han LGU-Ormoc an panlimbasog han mga magturutdo ha pribado nga mga eskwelahan nga magpa-angbit hin kina-adman ngadto han kabataan, sanglit angay la hira tagan hin ayuda ha panahon han krisis.
Ini an nagin dako nga rason kun kay-ano nga nagpasa hin resulosyon an Ormoc City Council nga katagan hin tag 3 Mil nga Health Eemergency Relief Subsidy an mga magturutdo ha pribado nga mga eskwelahan dida han syudad. Ngatanan han 15 nga kaapi han konseho in nagka-urusa ngan waray may tumipa han pag-arubar han resolusyon naghahangyo kan Mayor Richard Gomez para han pag-alotaga han pondo.
Sumala pa han konseho, dako hin duro an epekto han pandemya tungod kay na-undang an panmayad han tuition ha private schools ug naghimakuri an pagpasweldo han ira mga empleyado. Tungod hini, angay la nga katagan hira hin ayuda.
Ini nga pitad han konseho an ira iginpatamak han patakaran nga puede umayuda an LGU ha mga magturutdo pinaagi han pag-gahin hin pondo tikang han Special Education Fund. Ini in iginkalipay naman han mga nagdudumara sugad man mga personales han private schools ha Ormoc.
Ha deri pala maiha, an gobyerno han syudad an nanhatag han ikaduha nga sako hin bugas ha kada pamilya. Waray pamilya nga ginpipili an panhahatag. Ngatanan natatagan, subay han mando ni Gomez.
Hadton Abril igin-distribuer an syahan nga tag-usa ka sako, samtang antis matapos an Hunyo gintikangan an panhatag han ikaduha ka sako hin bugas. #
