Agosto 17, 2023
Segurado nga magtitikahitaas pa an presyo han bugas ha Eastern Visayas ha masunod nga pira ka semana.
Ini an nakakabaraka nga pahayag ni Frederick Dy, Presidente han Tacloban Chapter han Grain Retailers Confederation of the Philippines ha pakighimangraw han iFM-RMN Radio Tacloban, Agosto 17, 2023.
Nagsering hi Dy nga aadto pa hit Setyembre an panahon han katbari o pag-ani han kadam-an nga umhanan hin humay sanglit kulang an lokal nga produksyon han bugas.
Mayda na gad nagtikang pagbari ha Abuyog, Leyte sumala kan Dy, pero nag-aaragaw hin pagpalit an mga negosyante, sanglit ini nga mga nakakapalit in puede makagdikta han ira karuyag nga presyo kun igpapasarang na ha mga retailers kay deri man damo ini nga suplay.
Nagtotoo gihapon hi Dy nga mayda natatabo nga krisis hin bugas yana, sanglit kinahanglan nga manginlabot an gobyerno kay nagtitikadamo la an naghihimakuri ha pagpalit han bugas.
Hapagkayana, talagsa nala an sobra 30 pesos kada kilo hin bugas. Kasagaran sobra na hin 40 ngadto ha 50 pesos an presyo kada kilo ngan mayda na ngani 60 pesos an presyo.
Gintutudlok ni Dy nga rason hini nga krisis an paghimo han balaud nga Rice Tarrification Act ha panahon ni anay Presidente Duterte. Hadto nga panahon, nagpatapod an gobyerno nga magtitikahabubo an presyo han bugas kun magin balaud ini, pero tarihas an natabo, kay nagtikahitaas lugod an presyo han bugas.
Nagtotoo gihapon hi Dy nga mayda cartel o sindikato denhi ha Pilipinas nga amo an nagmamani-obra basi hira an makakagdikta han presyo han bugas nga amo an panguna nga pagkaon han mga Pilipino. #
