Isumat.com/Agosto 11, 2023
Malina-umon hi Senador Mark Villar nga deri na mag-iiha magigin balaud na an One Town One Product (OTOP) nga programa han gobyerno.
Ini an iya iginsumat ha mga taga media durante han iya pagbisita ha Rehiyon Otso kakulop nga adlaw, Agosto 10, 2023 kun diin hiya an nagin panguna nga bisita hin dako nga okasyon ha Maasin City, Southern Leyte.
Hapagkayana, an balaudnon han OTOP in nakalusot na ha senado ngan ha deri maiha magkakaada na han bicameral conference upod an mga kongresista ngan igpapasa na an balaudnon ha Malakanyang para mapirmahan han presidente.
Hi Villar nga nagpangamay-amay han OTOP Bill ha senado an nag-esplikar nga dako hin duro an mahibubulig hini kun magin hul-os na ini nga balaud kay kada tuig an gobyerno nasyunal in mag-aalokar hin pondo para hini nga proyekto.
Kun kada tuig segurado an pondo, matatagan hin dako nga atensyon an paglunsad ngan promosyon han tagsatagsa nga mga produkto an mga Local Government Units.
Pinaagi hini, maag-aabri ini hin mga industriya ngan kadugangan nga mga oportunidad para han mga nagbibiling hin pakabuhi ngan trabaho. An labi nga makakabenipisyo hini amo an sektor han Micro Small and Medium Enterprises (MSME), dugang pa han senador.
Hapagkayana, an OTOP in deri pa usa nga balaud ngan ini in gindudumara han Department of Budget and Management.
Dida han iya pag-abot kakulop ha Tacloban Airport, hi Villar in nagpasalamat han suporta nga iginhatag ha iya han mga taga Eastern Visayas han nag-agi nga eleksyon kun diin napili hiya nga senador.
Iya iginpasarig nga magpapadayon an iya hul-os nga paningkamot ha pagpanday hin mga balaudnon nga makakabenipesyo han kadam-an nga Pilipino. #
