Isumat.com/Agosto 11, 2023
Waray na maka-urulang han paghimo han Causeway-Bridge nga proyekto nga magsusumpay han downtown Tacloban ngan Daniel Z. Romualdez Airport ngan an pagtrabaho hini an ma-arangkada na ha deri maiha nga panahon.
Ha pakighimangraw ni DPWH Regional Director Edgar Tabacon ha mga kaapi han media kakulop, Agosto 10, iya iginpatapod nga pira nala ka semana titikangan na an konstraksyon han proyekto. Ini in katapos la nga bulkason han Sanguniang Panglungsod han Tacloban an ira resulusyon nga temporaryo deri la anay tikangan an pagtukod hini tungod hin mga isyu ha kalibungan labi na an kabutangan han Kankabato Bay.
Nagsering hi Tabacon nga nabaton ngan naklaro han DPWH ngadto han mga konsehales han syudad nga tatagaron hin hapsay an sitwasyon han Kankabato Bay basi waray madidistroso han natural nga karikuhan hini nga parte han kadagatan ngan kabaybayunan.
An DPWH in nagdesisyon nga magkaada hin pagbag-o an proyekto ngan ini in naglalakip nga pahilabaon an tulay tikang han orihinal nga 180 metros ngadto hin 360 metros. Pagdudugangan gihapon hin darudagko nga box culverts an causeway basi waray makaulang han agos han tubig.
Tungod hini nga mga pagbag-o, nag-umento an kantidad hini nga proyekto. Nagin 4 bilyones na ini tikang han orihinal nga 3.4 bilyones pesos, pahayag pa ni Tabacon.
Kun manunumduman, an pondo nga 800 Milyones pesos para han first phase han proyekto in nabukalsan na ngadto han mga kontraktor.
Ini nga proyekto in magkakamay-ada hin 4-lanes nga road embankment ha magkaluyo nga parte ug aada ha butnga an tulay.
Ini in makakagpahalipot han biyahe tikang ha downtown Tacloban ngadto ha airport ngan ini in magigin 10 minutos nala kumparar han 45 minutos nga pagsulsog yana han nasabi nga ruta.
Ginlalauman nga dako an magigin kontribusyon hini han tiarabot nga pag-upgrade han DZR Airport ngadto hin pagigin international airport.
Waray naman maghatag hin insakto nga panahon hi Tabacon kun san-o matatapos an proyekto kay madepender ini han ig-aalutuga nga pondo han national government kada tuig. #
