Isumat.com/Agosto 17, 2023
Tungod han pag-insulto han ira otoridad, ginhihingita han Sanguniang Panlalawigan (SP) han Southern Leyte nga arestuhon han kapulisan an namumuno han DPWH Southern Leyte 2nd Engineering District.
An SP-Southern Leyte in nagpasa hin resolusyon dida han ira sesyon hadton Agosto 14 kun diin iginmamando hini nga dakpon hi District Engineer Eduardo Santos. Ini in tungod kay ginbaliwaray ni Santos ha ika-unom ka beses an imbitasyon nga umatubang hiya ha konseho.
Subay han resulosyon, ini nga pira na ka beses nga waray pagtagad ni Santos han ira imbitasyon in matutudlok nga “way of insulting their authority.”
An konseho in nagkumbida kan Santos nga umatubang ha ira basi mag-esplikar kun kay-ano nga nagtitikadamo an dagko nga mga tarpaulin posters hin lokal nga mga pulitiko nga ginbabalandra ha ligid han national highways ha Southern Leyte.
Igindidig-on han konseho nga deri ini angay tugutan han DPWH kay may derektiba an gobyerno nasyunal nga waray makakabala-ong o maka-urulang ha mga kakalsadahan.
Kun manunumduman, hi anay Presidente Duterte in nagmando nga tanggalon tanan an mga road obstruction ha bug-os nga nasud.
Hadton Hulyo, nagrason hi Santos nga mayda niya official travel ha Manila sanglit deri hiya makaka-atender han sesyon.
Nagsering pa hi Santos nga andam hiya makighimangraw ha SP-Southern Leyte bisan ano nga oras ha kondisyon nga didto ini hihimoon ha DPWH Regional Office ha Palo, Leyte.
Ini nga resolusyon han konseho an igpapadara ngadto ha Maasin City Police Office basi ig-implementar an nasabi nga Arrest Order kontra kan Santos. # (via Manila Times)
