Isumat.com/10:52AM, June 14, 2020
Temporaryo nga iginpasara ni Mayor AngeL Sia han La Paz, Leyte an Rural Health Unit han ira bungto katapos la matapnan han COVID-19 in pira nga health workers.
Dida han pahayag ni Sia, unom nga nagtatrabaho han RHU an natapnan han kagaw. Lima ha ira in residente han munsipalidad samtang an usa in taga Tacloban City pero adto nagtatrabaho ha La Paz-RHU.
Labot la ha ira, nag positibo gihapon han corona virus in usa nga driver ngan empleyado han LGU, sugad man duha pa nga residente nga naka-uli ngadto han bungto tikang ma-stranded ha iba nga lugar.
Ini nga napulo ka tawo in lakip dida han 68 nga Positive Cases ha Region 8 nga iginpasamwak kagab-I (Hunyo 13) han DOH .
Hadton Biernes, nagka-ada han syahan nga Positive Case an bungto pinaagi hin usa nga lalaki nga naka-admit ha EVRMC. Waray hini travel history ha mga lugar nga may virus pero gin-confine hiya ha hospital tungod hin Respiratory Illness ngan gumawas nga nagpositibo hiya han virus.
Sumala pa han alcalde, waray iginpapakita nga mga sintomas han sakit an mga bag-o nga kaso ngan ngatanan hira aadto ha Isolation Center han LGU. Nagdudumara gihapon hin contact tracing an LGU ug ngatanan nga matutudlok nga indibiduwal in igpapa-ilarum ha isolation ngan swab testing.
Hapagkayana, deri pa nadidiskubre han LGU kun diin nagtikang an virus ha ira bungto.
Nagsering pa hi Sia nga nag-request na hiya ha probinsya han Leyte nga dugangan an mga personales han RHU basi makag-abri an operasyon hini. Kun waray kadugangan nga magtatrabaho, deri mabalik an pagserbe han RHU.
Ginhangyo naman han alcalde an mga bungtuhanon nga hingpit an himoon nga paghirot kontra han kagaw kay waray ginpipili an virus. Iya liwat gin-aghat an katawhan nga deri magpasarang hin negatibo ngan peke nga mga impormasyon mahitungod han virus.
Ha Luyo nga bahin, an DOH in nag-iistudyo na yana han mga records kun angay naba igdeklarar nga mayda na natatabo nga local transmission han virus ha La Paz. Denhi ha rehiyon, an bungto han Tarangnan an natudlok nga mayda local transmission.
Nagsumat naman hi Mayor Sia nga hapagkayana waray pa plano nga mag-implementar hin lockdown ha iya bungto. # (KEVIN SIOSANA)
