Isumat.com/ Nobyembre 7, 2022
Kadagmitan nga hustisya an iginguguli-at han mga paryentes ngan miembero han LBGTQ+ Community ha Catarman, Northern Samar ha brutal nga pagpatay kan Jasper Marquez hadin Nobyembre 5, 2022.
Ha inisyal nga imbestigasyon, hadton gab-i hadto nga petsa, hi Marquez nga volunteer ha Catarman Philippine Red Cross Chapter in nagpahalibway kaupod hin iya sangkay ha usa nga bar ha Catarman. Nagsering hiya han iya kaupod nga mauli na hiya, pero mayda anay niya pakikigkita-an pa nga tawo antis umuli.
Kinabuwasan han aga, nadiskubre an patay nga lawas han biktima ha masighot nga parte han diversion road ha Brgy Galutan. Marquez in nag-antos hin mga binun-an ha magkalainlain nga parte han iya lawas.
Iginpahayag pa han mga imbestigador nga nawawara an pitaka ngan cellphone han biktima.
Deri la harayo tikang han lugar kun diin nakit-an an patay nga lawas, nakit-an gihapon an iya motorsiklo harani han tulay.
An mga kapulisan in padayon pa nga nag-iimbestigar han nasabi nga insidente basi matudlok ngan madakop an mga suspetsado, samtang an mga kaurusa ni Marquez ha “rainbow community’ in makusog an panawagan para hin hustisya.#
