Isumat.com/7:23AM, Marso 3, 2021
Waray katugutan tikang ha Malakanyang an operasyon han Peryahan ng Bayan, sumala kan Royina Garma, Vice-Chairperson ngan General Manager han Philippine Charity Sweepstakes Office (PCSO).
Ini an unod han surat nga iginpadangat ni Garma kan PBGen Ronaldo de Jesus, an nangungulo han PNP-Eastern Visayas. Ini nga surat ni Garma kan De Jesus in petsado Pebrero 26, 2021 kun diin klaro nga igin-aasoy han PCSO nga suspendido la gihapon an pagpamulay ngan pagpataya han Peryahan ng Bayan.
Pira pala ka adlaw an nakalabay, an Victoria Development and Ventures Cosporation (VDVC) in nag-reklamo kan De Jesus tungod han padayon nga operasyon han Peryahan ha Region 8 kun diin ginhihimo nga paagi para han pagpataya han iligal nga swertres. An VDVC amo an nag-uusa-an la nga lehitimo nga korporasyon nga gintagan hin otorisasyon han PCSO nga magdumara ngan magpamulay han Small Town Lottery (STL) ha Tacloban ngan probinsya han Leyte.
Dida han nasabi nga surat, igindig-on ngan iginpahinumdom ni Garma kan De Jesus nga lakip han trabaho han kapulisan amo an pagpoypoy han ngatanan nga klase hin pagpahuygo nga supak han balaud upod na ini an peryahan nga nagpapabilin nga suspendido an operasyon.
Labot la nga suspendido an Peryahan, an PCSO in waray maghatag hin permiso ha bisan hin-o o ano nga grupo nga maghimo han pamulay han Peryahan ha Eastern Visayas.
Tungod hini, dako nga paki-ana ngan misteryo kun kay-ano nga nagpapadayon an iligal numbers game ha mga bungto…bisan kun klaro nga waray katugutan hi Presidente Duterte ngan suspendido an Peryahan, igindidig-on la gihapon hin pira nga opisyal han PNP ngan mga LGUs nga nasusubay ha balaud an operasyon han peryahan. Kay-ano daw la?
Dida hini nga sitwasyon, an nakakatagamtam han dako nga salapi tikang han tayada amo an mga nagdudumara han iligal nga pagpahuygo ug an mga protektor hini. Waray bisan tikip hin sentimo nga nahingangadto ha gobyerno kay deri man nabayad hin buhis. Waray liwat ini iginpapadangat nga kabaraydan ha PCSO nga makakabulig unta han mga kablasanon nga nangangaro hin ayuda tikang han ahensya. #
