Isumat.com/8:49AM, Marso 2, 2021
Arestado han mga otoridad an pangulo han mga barangay kapitan samtang ginpatay naman in usa nga delivery man ha magkalain nga insidente hadin nakalabay nga adlaw.
Dida han gindumara nga buy-bust operation ha Hinunangan, Southern Leyte, an mga operatiba in nakadakop han suspetsado ginkilala nga hi Romeo Ochea Saturinas, 57 anyos, residente han Brgy Pondol. Hiya an kapitan han barangay ngan ABC President han munisipalidad.
Nakumpiskar tikang kan Saturinas in pira ka sachet hin gin-aalegar nga shabu balor hin 20 Mil pesos. An mga elemento han PDEA-Southern Leyte, Southern Leyte Provincial Drug Enforcment Unit, PNP Mobile Force ngan Hinunangan PNP an nagburublig dida hini nga operasyon.
Ha iba nga panhitabo, namatay in usa nga delivery man han pagpusilon hiya hin deri kilalado nga suspetsado ha Brgy Lokilokon, Paranas, Samar.
Ginkilala an biktima nga hi Roberto Tiongco, 35 anyos, ngan residente han Brgy 1, Salog, Catbalogan City.
Hi Tiongco ug an iya duha nga kaupdanan in nagbibiyahe sakay han delivery van han balabgan an kalsada hin usa liwat nga sarakyan. Ginpahaw-as han suspetsado hi Tiongco ngan pira ka beses nga pinusil hinungdan han iya kamatay.
Kadagmitan umiskapo an suspetsado. An mga otoridad in nakakuha hin mga basiyo hin bala ha lugar han krimen. #
