Isumat.com/Agosto 18, 2022
Nagpasarig an DPWH-Regional Office nga makukumpleto an paghingayad han San Juanico Bridge antis matapos an tuig 2022.
Iginreport ni DPWH Regional Director Allan Borromeo nga an ira ahensya in nagpapadayon han rehabilitasyon han mao nga tulay basi maseguro nga katatapuran an istraktura.
Subay han iya pahayag, an paghingayad han nasabi nga tulay in ginpondohan hin 84.7 Milyones pesos kun diin ginlalakipan ini han pagpahuruhugot han high tension bolts sugad man pag-pintura han structural steel.
Nag-esplikar hi Borromeo nga duro kakinahanglan nga magkaada hin major repair an San Juanico Bridge basi maseguro an katalwasan han mga motorista ug an publiko nga nagamit hini kada adlaw, ngan basi matudlok an mga problema nga bangin magin kawsa hin deri maupay nga sitwasyon ha tiarabot nga mga panahon.
Ngatanan han paningkamot in ginhihimo yana han ira personales basi matapos an pag-ayad han tulay antis umabot an 2023, sering pa han opisyal.
An San Juanico Bridge an nagsusumpay han Leyte ngan Samar ngan 50 anyos na an nakalabay tikang mahimo ini.#
