Isumat.com/Agosto 18, 2022
Deri na maiihap an mga madugo ngan bayolente nga panhitabo kun diin naa-aktuhan hin mister an iya misis nga may iginkakahilawas nga iba nga lalaki.
Deri la harumamay it sugad hini nga eksena ngan kasagaran nagigin brutal in dinadangatan tungod hin kapungot, kabido ngan pagsisirom hit kabubwason, sanglit ha sugad hini nga mga sitwasyon, mayda nagbubuhis hin kinabuhi.
Pero an nahitabo ha Alangalang, Leyte hadin Martes, Agosto 16, 2022 in na-iiba an kahimtang kay an suspetsado deri an mister kundi an anak han misis nga nakabuklo nga an iya nanay in may iba nga lalaki.
Nagsarang ha mga reports ha radyo ngan social media ini nga panhitabo kun diin an patay nga lawas han biktima ginkilala nga hi Rey Vergara, 45 anyos, pedicab driver in nakit-an ha sementeryo nga nakarigos hin dugo ngan damo an kasamdan ha lawas.
Ha imbestigasyon han kapulinsa, an suspetsado in ginkilala nga hi John Mark Caones. Hiya in anak han gintutudlok nga oyab han biktima.
Subay han pahayag han Alangalang PNP, nakit-an ni John Mark an iya nanay nga sumakay hin pedicab hadto nga gab-i ngan iya ini ginsundan, ngan ha sementeryo han bungto an destinasyon han pedicab.
Umuli ha ira balay an suspetsado ngan kumuha hin sundang ngan bumalik ha kamposanto. Ngan didto iya mismo personal nga nasaksihan an driver han pedicab ug an iya nanay in nagbubuhat hin kinalibutanon nga panginahanglan ha igbaw han pantyon.
Dida hini nga takna, ginpaninigbas han suspetsado an biktima rason han kamatay hini, pahayag pa han Chief of Police han bungto.
An suspetsado in na-aresto ngan nakatalaan umatubang han kaso nga igsasalawad kontra ha iya.
Ha report han pulisya, an nanay han suspetsado in nag-admiter nga mayda niya relasyon ha pedicab driver. Igin-asoy gihapon han babaye nga deri hira bulag ngan han iya mister.
Deri man nga nagdadahom kita, pero kun ikaw an makabisto nga an imo higugmaon ngan tinahod nga nanay in nakikighilawas ha iba nga lalaki, ano an imo paghihimoon??
