Isumat.com/Agosto 18, 2022
Gin-iimbestigar yana han mga kapulisan ha Catbalogan City, Samar kun ano an nagin hinungdan han pagkamatay hin duha nga kalalakin-an katapos la nira tumambong hin kapiestahan ha usa nga barangay han nasabi nga syudad.
Kakulop, Agosto 17, 2022, natad-an han mga mangirisda an patay nga lawas han biktima ginkilala nga hi Danny Cabanganan; samtang an iya kaupod nga hi Noli Violen in natad-an yana nga aga han Agosto 18 ha Brgy Basiao.
Ha inisyal nga imbestigasyon, an duha in nanmatron ha Brgy Darahuway Daco hadton Martes, Agosto 16 ngan tikang hadto waray notisya an ira pamilya kun hain na hira tobtob kakulop ngan yana han makit-an an ira patay nga lawas.
An mga biktima in parehas nag-uukoy ha Brgy Pangdan, Catbalogan City.
Dida han pahayag han imbestigador han insidente, hira Cabanganan ngan Violen in pumakadto ha isla nga barangay ha Darahuway basi mamista. Hira in sumakay han ira kalugaringon nga motorboat.
Umabot hira ngadto han ira sangkay alas 2 han kulop, ngan pagka alas 7 han gab-i in lumakat na hira basi umuli na.
Pagka alas 10 hito nga gab-i, an mga mangirisda in nakakita ha lawod han motorboat pero waray na sakay hini nga mga tawo.#
