(File photo courtesy)

Isumat.com/Agosto 18, 2022

Naawat an kinabuhi hin usa nga kaapi han Philippine National Police ha Northern Samar han aksidente niya makablit an pusil nga iya ginlilimpyuhan.

Ginkilala an biktima nga hi PCpl Mar Dino Estellero, 35 anyos, ngan taga Brgy Balite, San Jose, Northern Samar.

Hiya in nakadestino ha Northern Samar Police Provincial Office.

Dida han panguna nga imbestigasyon, hi Estellero in naglilimpyo han iya pusil han disgrasya nga makablit niya ini ngan bumuto. Naigo ha ulo an biktima rason han iya kamatay.

Gintalinguha pa nga madara hiya ha hospital pero igindeklarar han mga doktor nga dead on arrival.

Samtang, ha iba nga panhitabo, usa nga pedicab driver an namatay han pusilon hiya hin riding-in-tandem kakulop han aga, Agosto 17, 2022 ha Catarman, Northern Samar.

An biktima in ginkilala nga hi Rolly Geralsido, 44 anyos ngan residente han Brgy Airport han mao nga bungto.

Pasado alas 6 han gab-i han pusilon hiya hin duha nga sakay hin motorsiklo ha Brgy Santol, Catarman. Kadagmitan kumalagiw an mga suspetsado katapos han krimen. Ini nga panhitabo in gin-iimbestigar pa han mga otoridadl.# (with reports from Samar Daily News Online, Aksyon Radyo Catarman, Northern Samar News & Information)