Isumat.com/Agosto 17, 2022
An mga tinubyanan han balaud in deri kinahanglan magpasabot ha nagdudumara han eskwelahan kun may paghihimoon nga illegal drugs buy-bust operation ha campus, sumala kan Edgar Jubay, Regional Director han Philillipine Drug Enforcement Agency (PDEA) ha Eastern Visayas.
Ini an nagin kabatunan ni Jubay han pahayag han Visayas State University (VSU) kataliwan la nga maghimo hin buy-bust operation an mga otoridad ha lugar nga sakop han eskwelahan hadton Agosto 5, 2022 kun diin may nadakop nga suspetsado.
Nagsering an VSU nga unta nagpasabot an mga kapulisan kun magkakaada hin operasyon ha sulod han campus basi deri mahibutang ha peligro an mga personales ngan estudyante han eskwelahan pananglitan deri magkakilala-ay an mga otoridad ngan security personnel han VSU nga parehas armado.
Hi Jubay in nagklaro nga basar han kanan PDEA Manual for Operations, waray napapatik nga kinahanglan pasabton an ano man nga establisemento o eskwelahan nga mayda sugad hini nga operasyon kay duro ini hin ka-sekreto nga aktibidad ngan kinahanglan waray mahungaw nga impormasyon ngadto han bisan hin-o nga waray labot han operasyon.
Igindig-on pa han opisyal nga “insider” han VSU an ira target sanglit makuri kun may iba nga makakasabot hini. Ini in labot la nga High-Value Target an suspetsado kay nakumpiskar pa ngani ha iya in 100 grams hin iligal nga droga.
Igindugang pa ni Jubay nga puede gad magpasabot ha tagdumara han eskwelahan kun “drug user” an target basi makabulig an unibersidad han rehablitasyon ngan pagbag-o han kinabuhi, pero kun “pusher” an target, deri na magkikigsumpayan an kapulisan ha establisemento kay bangin pa lugod maka-ikyas an suspetsado.
Kasumpay naman han posible nga peligro ha iba nga tawo, nagsering hi Jubay nga an mga kapulisan in hingpit an training ngan eksperiensya ha sugad hini nga operasyon, sanglit ginseseguro gud nga deri manenelikado an iba nga deri target han operasyon.
Ginklaro pa ni Jubay nga an nagdumara han operasyon amo an Leyte PNP Office ngan Baybay City Police, samtang an PDEA an naghatag han Certificate of Coordination hadto nga operasyon.
Dida han ira opisyal nga pahayag, an VSU in nagpasabot nga ginsusuportaran nira an gobyerno ha pakigbisog kontra han iligal nga droga. #
