Isumat.com/Mayo 12, 2023
Katapos hin pira ka bulan nga hurobhurob kun mapakain an taga Ormoc City nga PBA star Robert Bolick, nag-alsa balutan na an basketbolista tikang han liga ngan nagpirma hin kontrata ha Japan B League.
Duha na ka tuig nga segi an pangoyab ha iya han mga teams ha Japan, pero kay deri pa tapos an iya kontrata ha NorthPort Batang Pier sanglit waray hiya makakagdesisyon.
Ha report nga nahikay han IsumatNews, duha ka tuig nga kontrata an iya pinirmahan ug an iya sweldo in maabot hin 1.7 Milyones pesos kada bulan.
Hapagkayana, deri pa nagpapagawas hin detalye kun ano nga team ha Japan an aapihan ni Bolick kay maghuhulat pa nga an team mismo an magpapasamwak hini.
Hadton Abril 21, 2023 natapos an kontrata ni Bolick ha NorthPort. Nag-opreser an NorthPost hin hitaas nga kantidad basi mag-renew hin contract an Ormocanon pero gindedma ini ni Bolick.
Antis hini, nahisumat gihapon nga ginpupuntirya han San Miguel Beer hi Bolick pero waray gihapon ini matuman. #
