Isumat.com/Mayo 12, 2023

Deri na kinahanglan magdumara hin public hearing kun magpapa-umento han kabaraydan han tubig tikang ha PrimeWater Leyte Metro.

Ini an nagin kabatunan ni Ronnie Cornico, General Manager han LMWD ha interview han iFM-RMN yana nga adlaw, Mayo 12, 2023.

Nagsering hi Cornico, deri nahipapatik ha aludayday han National Water Resources Board (NWRB) nga kinahanglan pa an public hearing kun magpapa-umento hin kabaraydan an water district.

Nag-esplikar hi Cornico nga an Prime Water in nagsubmiter han proposal han umento ngan gin-aprobaran ini han LMWD Board ngan ini in nasusubay han regulasyones han NWRB.

Nagsumat pa an opisyal nga kinahanglan na gud nga magpa-umento han kabaraydan kay duro na an pagtikahitaas han gastos ha operasyon han water district. Hadto pa han 2003 an katapusan nga pag-umento han water rates han LMWD ngan humagos na in 20 anyos nga waray umento.

Swerte ngani an mga kunsumidor han LMWD kay an gibabaratuhi nga kabaraydan han tubig ha Region 8 in tikang la ha LMWD ngan marumahal an iba nga water districts, dugang pa ni Cornico.

Hadton 2003, trenta mil la an kunsumidor, pero yana sobra na ini hin 60 mil ngan damo pa an nag-a-aplay sanglit kinahanglan hin kadugangan nga facilidadis pahayag pa han General Manager.

Kun manunumduman, nakalasan an kadam-an nga kunsumidor tungod han tigda nga paghitaas han water rates yana nga bulan han Mayo.

Hadton 2014, mag-uumento na unta an kabaraydan pero waray ini igdayon tungod han epekto han Bagyo Yolanda. #