Isumat.com/10:00AM, June 17, 2020
Kun makatalwas hiya han COVID-19 ngan matapos an iya isolation, posible nga igpadayon an iya kwarentina ha karsel.
Ini in matatabo kun mapamatud-an ha korte nga may ginsupak nga balaud in usa nga Positive Case ha Ormoc City. Hi Mayor Richard Gomez in desidido nga magsalawad hin kaso kontra hini nga pasyente dara han pagtalapas han health protocols han syudad.
Sumala han report nga nahikay han Isumat.com, ini nga tawo in nakabalik ha Ormoc tikang ha iba nga lugar ngan dumeretso ha ira panimalay ug waray koordinasyon ha LGU. Ginkuha nala hiya han mga otoridad ha iya balay han mabisto nga nakalusot hiya ngan iginbutang ha Quarantine Facility.
Paghagos hin pira ka adlaw, nagpositibo an resulta han iya swab test nga nagin rason nga igin-lockdown an iya barangay basi makagdumara hin contact tracing ngan kuhaan hin swab samples an iya ginkahibalag nga katawhan. An resulta han laboratory test para han contact tracing in ginpapamulat pa.
Nagpahayag an Ormoc City PNP nga ira yana gin-aandam an kaso nga pakasupak han Republika Acta 11332 o Mandatory Reporting of Notifiable Diseases Act sugad man an deri niya pag-kooperar ha ha mga otoridad.
Kun mapamatud-an an iya kasaypanan, mumultahan hiya hin tobtob 50 mil pesos ngan puede mapreso tikang usa tobtob unom ka bulan.
Nagpahinumdom hi Gomez ha mga barangay officials nga deri gud tumukal han ira pagmonitor han mga nagkakabalik nga residente ngan kun makasabot hiya nga waray umagi han mga patakaran, deri hiya mag-aalang pagdeklarar hin lockdown han lugar nga nadadabihan.
Iginsumat pa ni Gomez nga tikang yana kun mayda pa mabuklo nga lumusot tikang ha iba nga lugar, dadad-on na hira ha Evacuation Center ha Brgy Danhug ug an ira pamilya an magtitigayon han pagkaon ngan iba pa nga panginahanglan.
An deri mga pasaway in gindadara ha COVID Ligtas Center ha Brgy Dolores kun diin libre an pagkaon, tubig, kuryente ngan internet.
An Ormoc City in mayda na 42 ka tawo nga nag positibo han COVID-19. # (KEVIN SIOSANA)
