An mga opisyales han DepEd Ormoc City Division nagpapakita han mga tropeo para han elementary, secondary, ngan overall championship.

Isumat.com/Abril 28, 2023

Iginparayaw han Ormoc City Siglakas Elites an deri matutupngan nga pwersa han malinangpuson nga ira nadepensahan an trono komo Overall Defending Champions han Eastern Visayas Regional Athletic (EVRAA) Meet.

Dida han pagtapos han EVRAA 2023 kakulop, Abril 27. ha Leyte Sports Development Center, igindeklarar an Ormoc nga amo la gihapon an kampeon. Hira an nanguna ha elementary division ngan naghadihadi gihapon ha secondary level.

Hadton 2018 ngan 2019 nga EVRAA Meets, an mga Ormocanon an nagin kampeon. An nasabi nga kompetisyon in nakanselar han 2020, 2021 ngan 2022 tungod han Covid-19 Pandemic.

Nagin minahan para han gold medals han Team Ormoc an swimming ngan athletic events, sugad man an volleyball ngan basketball.

An Leyte Division nga nakakolekta hin 50 gold medals an naka-angkon han ikaduha nga pwesto. Ini nga grupo an kampeon han EVRAA tikang han 2008 tobtob han 2017 antis hira sikaran han Ormoc dida han 2018 EVRAA.

An Tacloban City Red Stallions in nakatugpa ha ikatulo nga pwesto pinaagi hin 19 golds ngan 27 silvers.

19 golds gihapon an nakuha han Maasin City pero natagak hira ha ika-upat nga lugar kay 23 silvers la an ira naangkon.

Ikalima naman an Eastern Samar nga naghikay hin 14 golds ngan ika-unom an Baybay City nga mayda 13 gold medals.

Ginsundan ini han Samar Division – 11 golds, Southern Leyte – 10 golds, Calbayog City – 8 golds, Biliran – 7 golds, Northern Samar 6 golds, Borongan City 3 golds ngan Catbalogan City 2 gold medals.

Naghatag gihapon hin Special Awards an Department of Education Regional Office kun diin an Tacloban City an nakadaog han Best in Uniform, 2nd placer Eastern Samar ngan 3rd placer Leyte.

Igindeklarar naman nga Cleanest and Most Orderly Quarters an Catbalogan, ginsundan han Ormoc ngan ikatulo an Southern Leyte.

Ha luyo nga bahin, napili an Calbayog City nga Most Disciplined team, ikaduha an Samar ngan ikatulo an Southern Leyte.

Pormal nga igintubyan ha Ormoc City an pagigin host han EVRAA 2024 kun diin iginsaad han mga Ormocanon nga magigin malinangposon gihapon an sunod nga kompetisyon.

Hapagkayana, an DepED Regional Office in nagpipinalisar pa han mga atleta nga igpapadara ha Palarong Pambansa ha Marikina City hiton Agosto 2023.#