Isumat.com/Mayo 3, 2023
Hi Police BGen Vincent Calanoga an natudlok nga bag-o nga mamumuno han pwersa han kapulisan ha Eastern Visayas.
Dida han Special Orders nga iginpagawas kakulop, Mayo 2, 2023 han PNP General Headquarters ha Campo Crame, hi Calanoga nga miembro han PNP Class of 1991, an napili nga PNP Regional Director ha Sinirangan Bisayas.
Hiya an maliwan kan BGen Rommel Francisco Marbil nga malingkod komo bag-o nga hepe han Directorate for Comptrollership ha General Headquarters. An PNP Comptrollership Unit an na-asister ha PNP Chief ha administrasyon ngan pagdumara han “financial resources” han PNP.
Antis matudlok ha iya bag-o nga pwesto, hi Calanoga an nagin hepe han PNP Human Rights Affairs Group (HRAO).
An HRAO an nagpaplano ngan nagdudumara han implementasyon han PNP Human Rights Development Program.
Tobtob han ginsusurat ini nga balita, waray pa opisyal nga pahayag an PNP-Regional Office kun san-o an pormal nga paglingkod ni Calanoga ha iya bag-o nga katungdanan.
Ha luyo nga bahin, an maliwan kan Calanoga nga HRAO Chief amo an taga San Policarpo, Eastern Samar nga hi Bgen Limuel Obon. Hi Obon amo anay an PNP Bicol Regional Director.
Ini nga pagbarubaraha hin mga pwesto amo an gisasyahani nga revamp ha ilarum han bag-o nga PNP Chief Benjamin Acorda Jr nga lumiwan han nagretiro ngahi Rodolfo Azurin Jr hadin Abril 24, 2023.#
