Isumat.com/Mayo 4, 2023
Katapos hin haros usa ka tuig nga pag-iliw ngan pagpinamiling kan Kagawad Jaime Asinas han Brgy San Jose, Las Navas, N. Samar, natad-an han mga sundalo an iya patay nga lawas hadin Abril 29, 2023 ha lugar nga harani la han barangay.
Hadton Hulyo 9, 2022, hi Asinas in waray na kakit-i han sikmiton ngan patayon hiya han rebelde nga mga kumunista ha Brgy Epaw han nasabi nga bungto.
Ha report han Philippine Army, nagsumat ha mga sundalo hi Alfredo Cocoya alyas Lawin, anay kaapi han NPA Sub-Regional Security Force kun diin nga lugar nakalubong an patay nga lawas han kagawad ngan ginkadto ini han mga tropa han 31st Infantry Battalion ngan PNP Mobile Force Company.
An tul-an han patay nga lawas in positibo nga ginkilala han pamilya han biktima tungod kay an sul-ot nga bado ngan boots amo an gamit han biktima han adlaw nga mawara hiya.
Nagpahayag an pamilya nga ginsikmit hi Asinas han mga rebelde kay bumaribad ini nga gamiton an Internal Revenue Allotment o IRA han barangay nga suporta ha mga rebelde. Gintatahapan gihapon han NPA nga impormante hi Asinas han militar.
Usa nga alyas Bayot nga saksi han panhitabo an nagsaysay nga antis patayon an biktima, ginpalugaring ini pag-ukad han iya lubnganan. Katapos mag-ukad, gingapos ngan ginpaki-anhan hiya han mga rebelde kun hin-o an iya “handler” pero waray magtingog an kagawad.
Dida hini, pinusil hiya ha ulo ngan ginbunobuno pa han mga rebelde antis iglubong, pahayag pa han saksi.
Hi Jenny Asinas, misis han biktima, in mahugot an pangaraba hin hustisya para han iya kapikas ha kinabuhi. Sumala kan Jenny, deri makatawo an binuhatan han mga rebelde.
Kadungan hini, hi 3rd Infantry Brigade Commander Lt Col Isidro Vicente in mahugot nga nagkondenar han brutal nga ginawi-an han mga terorista. Sering han koronel, ini in nagpapakita la han tinood nga dagway han mga rebelde nga pagsarang hin kasamok ngan padayon nga pagtalapas han katungod pantawo.
Ha atubangan hini, hi Vicente in nanawagan ngadto han nasasalin nga mga rebelde nga bumalik na ha panig han gobyerno ngan igsurender an ira armas ngan magkaada hin normal ngan mahimyang nga kinabuhi. #
