Isumat.com/Abril 28, 2023
Nag-antos hin mga kasamdan ha lawas an tulo nga kasundaluhan han igka-asdangay hira hin grupo han mga rebelde nga kumunista ha Brgy Osmena, Las Navas, Northern Samar hadton Abril 24, 2023.
Ha report han Philippine Army, an mga tropa han 803rd Infantry Brigade in nagpapatrolya han mao nga lugar han igkasurapo hira han mga rebelde kun diin nagpabuto an mga kumunista nga terorista hin improvised explosive device rason han pagkasasamad han tulo nga sundalo.
Ginkilala an mga nagkasasamdan nga hira Lt Ron Ryan Pilapil, Cpl Jungie Causing ngan PFC Leomark Trucilla nga gindara ha hospital basi pagtambalon.
Iginpahayag han Philippine Army nga an mga kasundaluhan in naghihimo han ira regular nga pagbisita ngadto han barangay komo kaparte han kampanya kontra insurhensiya.
Sumala kan Col Efren Morados, Commander han 803rd Infantry Brigade, an mga rebelde in naghihimo hini nga pangatake basi madiskarel an paningkamot han gobyerno nga maghatag han serbisyo ngadto han katawhan labi na ha tay-aw nga mga lugar.
Ha atubangan hini nga panhitabo, ginseguro ni Morados nga deri mahunong an mga tropa han gobyerno pagtuman han ira obligasyon basi magkaada hin kauswagan ngan kamurayawan ha mga barangay.
Utro nanawagan an opisyal ha mga rebelde ug han ira supporters nga bumalik na ha piyod han balaud ngan makatagamtam han mga gin-o-opreser nga mga benefecio han gobyerno para ha ira. #
