Isumat.com/3:05PM,June 28,2020
Sunod kamo han insakto nga proseso, kay kun deri, maatubang kamo hin kaso.
Ini an nagin pahimatngon ni Tarangnan Mayor Arnel Tan ngadto han mga residente han iya bungto nga plano bumalik ha ira lugar samtang aada kita yana ha krisis han COVID-19. Nagsering an alkalde nga deri hiya magruruhaduha pagsalawad hin kiha kontra han mga Locally Stranded Individuals (LSI) nga deri makikigsumpayan ha LGU ngan malusot hin pag-uli ngadto han ira tagsatagsa nga barangay.
Hapagkayana, suspendido la anay an pagpabalik han mga LSI ha ira mga lugar tobtob Hunyo 9, 2020, pero nag-warning hi Tan nga deri hiya matugot hin pasaway nga mangunguli ha ira bungto. Mayda mga nanmamarayaw ngan mag-isog nga deri nagpapasabot nga maabot ngan kulang pa gud hin mga dokumento, ug ini in magdudurot hin kadelikaduhan ha mga Tarangnanon nga maiha na nag-iinantuson han grabe nga epekto han corona virus, pahayag pa han alkalde.
Bisan pa tugutan na nga makabalik an mga LSI, nagsering hi Tan nga deri kakarawaton ha iya bungto an mga Tarangnanon nga kulang hin papeles ngan waray koordinasyon. Importante gihapon nga nagpa-ilarum na hira hin swab testing antis pa magkabalik.
Nakaka-intindi kami han iyo inaabat nga gusto na umuli ngan igka-urusa an pamilya, pero kinahanglan sundon an patakaran basi deri magin dako nga problema, pahayag pa ni Tan.
Mensahe han alkalde ha mga LSI, “ayaw niyo ipaagi ha pamarayaw ngan pa-isogay an iya panguli kay deri ako mag-aalang pagpasampa hin kaso, pagsugad kamo han naha-una nga nagkabalik nga sumunod han pamaagi kay mahuyayag man hira nga ginkarawat han bungto.”
An Tarangnan in tulo na ka bulan nga nagin mapa-it ngan makabibido an kahimtang tungod han natabo nga community transmission han kagaw dida han bungto kun diin usa nga taga Calbayog an nagdara han virus ha ira lugar ngan nagpakatapon didto.
Hapagkayana, umabot na ha 35 nga mulopyo han bungto an na-igo han virus. Dida hini nga mga natapnan, 27 na an nakatalwas ngan iginka-urusa na utro han komunidad, samtang mayda pa upat an Active Cases ngan tulo in aadto ha Recovery Facility. An 80-anyos nga nagpositibo han virus amo an nag-uusaan nga binawi-an han kinabuhi nga mulopyo han bungto. (KEVIN SIOSANA)
