Isumat.com/ Nobyembre 25, 2022
Maglalantugi ngan igpapasundayag han mga banggi-itan nga surfers han nasud an ira abilidad dida han National Surfing Competition ha Borongan City, Eastern Samar.
Ini nga kompetisyon binansagan nga Surf in the City in aabrihan Nobyembre 26 ngan mahagos ini tobtob Disyembre 3, 2022 kun diin an top-notch surfers han Pilipinas an magpapa-isan-isan ha magkalainlain nga kategorya.
Kakulop, Nobyembre 24, tobtob Nobyembre 25, 2022 an mga national coaches ha panguna ni John Matthew Carby in nagdumara hin waray bayad nga pagtutdo han mga teknik ha surfing ngadto han mga batan-on nga intresado hini nga paugnat ha kusog.
Kasumpay hini, an syudad han Borongan in naglatag hin 1.1 Milyon pesos kantidad han mga premyo ug amo ini an gidadaku-i nga premyo ha kasaysayan han surfing ha aton nasud.
An magigin kampeon ha longboard ngan shortboard categories in makakadara hin tag 80 Mil pesos nga premyo; 50 Mil para han ikaduha; ngan 25 Mil para han 3rd placer.
Makakabitbit gihapon hin cash prizes an makakapwesto tikang ha ika-upat tobtob ha ika-siyam ha kada dibisyon.
Mayda gihapon torneo para han nag-eedad 18-anyos tipa-ubos, tinatawag ini nga groms division kun diin naghuhulat an mga cash prizes nga 20 Mil, 15 Mil ngan 10 Mil para han kampeon ngadto han ikatulo nga pwesto.
Ini amo an ikatulo nga higayon nga an Borongan City in nanagbalay han nasabi nga kompetisyon.
Para han yana nga 2022, ini an ikatulo nga leg han Nationals kun diin an syahan in didto ha Siargao, ug an 2nd leg in didto naman ha Baler, Aurora.
Ginbabanabana nga maabot hin 400 nga mga surfers upod an ira mga delegasyon an nagkaabot na ngadto ha Borongan. Ini in labot la han yinukot-yukot nga mga lokal nga turista ngan magkarita nga masaksi hini nga sports event.
Hayahay gihapon para han magkirita an venue han kompetisyon kay aada la ini ha Baybay Boulevard nga pira la ka minutos an pagbaktas tikang ha sentro han syudad. Aada gihapon an magkalainlain nga mga restaurants ngan pahalibwayan sapit la han venue.
Ginlalauman nga makakapadukwag ini han industriya han turismo han syudad sugad man han bug-os nga probinsya han Eastern Samar.
An LGU-Borongan ha panguna ni Mayor Jose Ivan Dayan Agda, Eastern Samar Provincial Government ha liderato ni Gov. Ben Evardone, ug an tinaglawas ha kongreso han probinsya Congresswoman Maria Fe Abunda in nagburublig para mahimugso ini nga kompetisyon. #
