Usa nga South African ngan usa liwat nga senior citizen an naglugaring pag-utod han ira tagsatagsa nga kinabuhi dida hin magkalain nga insidente hin suicide ha Leyte ngan Samar hadin nag-agi nga adlaw.
An syahan nga biktima in ginkilala nga hi Jacobus Daniel Venter, 55 anyos, taga South Africa ngan nag-uukoy yana Brgy Bitanhu-an, Baybay City, Leyte.
An kalungon ni Venter nga hi Nanette Mendoza, 41 anyos in nagreport ha kapulisan nga dida han alas 3 han maagahon, Nobyembre 23, 2022, iya nala nakit-an nga nahuyatang na ha kwarto an biktima nga nagbububura an baba.
Kadagmitan ginkadto ini han mga otoridad ngan gindara ha pribado nga hospital han syudad, pero igindeklarar nga dead on arrival.
Iginsumat ni Mendoza nga hadton Nobyembre 22, iya gin-istoryahan hi Venter nga bangin igpetisyon hiya han mga residente han barangay kay pira na ka beses nga nagriribok kun nakaka-inom an langyawanon.
Ha medical report, nagawas nga chemical poisoning an kawsa han kamatay ni Venter.
Samtang, usa naman nga senior citizen an gin-aalegar nagpusil han iya kalugaringon hinungdan han iya kamatay didto ha Gandara, Samar.
Ginkilala an biktima nga hi Honorato Mejorado, 64 anyos, byudo ngan residente han Brgy Tambungan. Ginbabanabana nga natabo an pagpakamatay pasado alas 7 han gab-i, Nobyembre 23, 2022.
Gintotoohan nga an pusil han biktima nga kalibre 357 an gingamit dida han insidente subay na gihapon han basiyo han bala nga nakuha dida han crime scene.
Hinsabutan ha imbestigasyon, nga nag-uusaan la an biktima ha iya balay ngan alagid-agid nga nag-aantos hiya hin depresyon.
Nag-asoy an iya anak nga usahay nagpipinaki-ana an iya amay kun kay-ano nga ma-iha pa man an iya kinabuhi.#
