Isumat.com/ Nobyembre 24, 2022
Mahugot nga ginkondernar ngan iginkakabido han militar an padayon nga pan-recruit han kumunista nga New Peoples’ Army han kabataan nga umapi han armado nga pakigbisog.
Hi Major General Camilo Ligayo, Commander han Philippine Army 8th Infantry Division, in utro nanawagan ngadto ha CPP-NPA nga humunong na ha panhugay han mga menor-de-edad nga umapi han ira grupo.
Ini nga panginyupo ni Ligayo an iya iginpabati kadungan han pakig-urusa han Philippine Army ha pagtigaman han Children’s Month yana nga Nobyembre.
Kun aton manunumduman, an rebelde nga hi Anthony Encinas nga sumurender ha militar pira pala ka adlaw an nakalabay, in nagbuyagyag nga dida han Bugsok Platoon kun diin kaapi hiya anay, mayda duha nga iya kaupod nga 17 anyos pala an edad.
Hi Encinas, alyas Aljur, in sumurender hadin Nobyembre 19 ha Calbiga, Samar upod an pagtubyan hin 19 nga armas de fuego.
Sumala kan Ligayo, kun 17 anyos na yana ini nga duha nga rebelde, segurado nga barubata pa ini nga duha han ma-recruit han NPA. Angay unta nga deri manginlabot an NPA ha mga kabataan kay ha sugad hito nga pangedaron, adto unta ha eskwelahan ini nga kabataan, dugang pa han heneral.
Sering pa ni Ligayo, deri makatawo nga makaka-eksperiensya an kabataan hin trauma tungod han pag-upod ha aragway, waray kaon-kaon hin pira ka adlaw, waray karukaturog tungod la han waray hangkag nga idolohiya han mga rebelde.
Iginpapaki-ana ni Ligayo kun kay-ano nga padayon gintatalapas han CPP-NPA an International Humanitarian Law kun diin may probisyon nga nagmamando nga an kabataan in deri puede pa-apihon ha bisan ano nga armado nga pwersa o hugpo.
Gin-awhag han opisyal an publiko nga suportaran ngan panalipdan an kabubwason han kabataan basi deri na magpadayon nga mahugay hira pag-api han kagi-usan kumunismo. #
