HUSTISYA !!!
Ini an mahugot nga iginsaad ni Mayor Melchor Mergal han Salcedo, Eastern Samar kasumpay han natabo nga haluag nga sunog ha watershed o kabubkiran didto han iya munisipalidad. Han nag-agi agi nga tulo ka adlaw, nasagipo an kadam-an nga mga grupo tikang ha Salcedo ug iba pa nga bungto ha pagparong han dako nga forest fire.
Hi Mergal in nagpahayag han duro nga iya kabido-an dara kay ura-ura an sakripisyo han iya pamunu-an sugad man han nag-agi nga mga administrasyon han bungto ha pagtanum ngan pagmentenar han nasabi nga kabubkiran nga may kahalu-agon nga 300 ektaryas. Sumala han facebook post han alcalde, haros ika-upat nala ka parte han watershed an waray kadarahig han kalayo nga nagtikang dida han Abril 12, 2020.
Sumala kan Mergal, iya tatagan hin hustisya an sakripisyo han mga nagtanom sugad man han mga nagburublig nga maparong an kalayo. Iya gihapon igindig-on nga maatubang ha balaud an mga tawo nga nagpapaluyo hini.
Iginbuyagyag han amay han Salcedo nga mayda nira mga suspetsado hini nga kasunog han ira kagurangan. Dida han iya post ha social media, derekta nga ginsidngan ni Mergal an mga gintatahapan nga yana pala kumuha na hira han ira mga abogado kay ha korte hira mag-aaragtubang.
An grupo han alcalde in nakatirok hin mga ebidensya dida han lugar han insidente. Ini in ginlalakipan hin mga sigarilyo, posporo, botelya hin makahurubog nga irimnon nga magtutudlok nga gintuyo gud ini. Usa gihapon nga anggulo nga ginkikitakita amo an pagsunog han mga kahoy basi magtikahaluag an tuna nga gagamiton han pag-uma. Nagsering pa hi Melgar nga may mga iligal nga nag-uukoy dida han watershed.
Kasumpay hini, iginpa-abot niya an hul-os nga pagpasalamat han mga indibiduwal ngan mga grupo nga naningkamot ha pagparong han kalayo. Amo ini an mga Bureau of Fire Stations han Salcedo, Guiuan ngan Gen. MacArthur, upod gihapon an kapulisan han Salcedo. Ginpasalamatan gihapon ni mayor an ESSU-Salcedo Campus han ira iginhatag nga ayuda.
Upod gihapon han nagburublig amo an mga empleyado han LGU, MENRO, Water System, Emergency Responders, Vice Mayor Fabillar ngan mga konsehales, SK Chairmen, mga punong-barangay ngan mga volunteers.
Labot la han hustisya, iginpatapod gihapon ni Mergal nga mas papahugton pa nira an mga pitad ha pagproteher han nasabi nga kagurangan. #
(Posted 4:03 PM, April 15, 2020)
