Isumat.com/7:30AM, July 30, 2020
Katapos maka-uli ha Eastern Visayas an sobra 600 nga Locally Stranded Individuals tikang ha Metro Manila yana nga semana, masunod naman pagbalik an mga LSI tikang ha Cebu.
An Cebu City Inter-Agency Task Force in nagpahayag hadin nag-agi nga adlaw, posible tugutan na makagawas ha Cebu ngan maka-uli ha ira tagsatagsa nga probinsya ngan bungto an sobra 15 Mil nga mga LSI nga maiha na naghihinulat nga makabiyahe.
Hi Cebu Councilor Joel Garganera, nagmamangulo han Task Force in nagpahayag nga ira aaprobaran an request nga travel authority han nasabi nga mga LSI dida hiton Agosto 1 basi makabalik na hira ha iba nga lugar. Tungod hini, nangangandaman yana an Task Force han posible nga pagbugi-ot han katawhan ha mga pantalan ha Cebu.
Problema gihapon kun ma-aakomodar an mga LSI han mga barko kay katunga manla han kapasidad han barko nga pasahero an papasakyon, pahayag pa ni Garganera. Dida hini nga 15 Mil nga LSI, pira ka yukot in mangunguli nganhi ha Region 8. An iba ha ira in sobra na usa ka bulan nga nag-iinukoy ha mga pantalan ngan nadepender nala han ayuda nga pagkaon tikang ha Cebu City Government.
Kun manunumduman, haros usa na ka bulan nga waray tumugot an Eastern Visayas pagpasulod han mga LSI tikang ha Cebu tungod kay kadam-an han nagkaka-abot tikang didto in positibo han corona virus. Kadam-an hini ha ira in mga residente han Ormoc, Baybay, ngan Southern Leyte.
Na-obserbaran gihapon nga haros tanan han mga nagpopositibo ha Region 8 hadin nag-agi nga tulo ka semana in tikang ha Manila ngan iba nga parte han Luzon tungod han suspension han biyahe tikang ha Cebu.
Naniningkamot yana an Task Force ha Cebu nga magin libre an bayad ha transportasyon han nasabi nga mga LSI tungod kay haros ngatanan ha ira in waray na kwarta. #
