Isumat.com/7:30AM, August 15, 2020
75 katawo an bag-o nga natapnan han Covid-19 ha Eastern Visayas ngan upod hini in pira nga health personnel ngan mga frontliners. Ini nga mga bag-o nga kaso an iginreport kakulop (Agosto 14) han DOH Regional Office.
Dida han siyam nga bag-o nga pasyente ha Catbalogan City, usa an health worker ngan tulo naman an frontliners. An iba in mga LSI ug usa naman an close contact hin nagpositibo hanhadi.
An Tanauan, Leyte in duha an bag-o nga kaso ngan usa hini health worker gihapon nga naka-admit nayana ha EVRMC. Ini nga health worker in nakatapon gihapon hin usa nga close contact. Hapagkayana, 124 na nga health personnel han rehiyon an natapnan han kagaw.
Nagpapadayon naman an paglarab han virus ha Brgy Villa Aurora, Basey Samar, Iginreport han DOH nga siyam an bag-o nga pasyente ug ngatanan residente han mao nga barangay. Naka-hard lockdown yana an barangay kun diin 50 na katawo an nadarahigan han virus.
Ha Villareal, Samar walo an nahidugang nga kaso ug ini in mga local transmission. Hira in natapnan han babaye nga ira close contact. Ini nga babaye in waray travel history ngan nagpositibo han ma-admit hiya ha Divine Word Hospital pira na ka adlaw an nakalabay.
Usa naman nga OFW tikang ha China an bag-o nga kaso ha Calbayog City.
Lima nga pasyente an nahidugang ha Eastern Samar. An Maydolong ngan Balangiga in tag-duha an bag-o nga kaso ug hira in mga LSI. Ha luyo nga bahin, waray travel history an bag-o nga kaso ha Taft. Hiya in nagpa-dialysis ha DWH ngan nagpositibo an resulta han swab test.
Duha naman an nahidugang ha Tacloban City. An usa natapnan han naha-una nga nagpositibo, samtang an usa in waray pa iginhatag nga detalye an City Health Office.
Ha iba naman nga mga bungto han Leyte, ngatanan mga LSI gihapon: Villaba-4; Palompon ngan Leyte tag-tulo; tag-duha naman an Alangalang, Julita ngan Jaro; ngan tag-urusa ha Burauen, Hilongos, ngan Baybay. Mayda gihapon usa nga nahidugang ha Palo pero waray pa impormasyon kun LSI o OFW ini.
Ngatanan LSI an mga bag-o nga pasyente ha Southern Leyte: San Francisco-2; Bontoc-4; Hinunangan-2; Liloan-2; ngan tag-urusa ha San Juan, Malitbog ngan St. Bernard.
Mayda naman 22 nga pasyente nga naka-recover kakulop sanglit umabot na 993 an nakatalwas tikang ha virus. Ha kabug-usan 1539 na an nagpositibo han kagaw ha Sinirangan Bisayas ngan unom an binawi-an han kinabuhi. #
