Isumat.com/ Marso 22, 2023
May posibilidad nga mahipaslak utro ha selda an siyam nga anay PNP Officers nga akusado dida han kaso pagpatay kan anay Calbayog City Mayor Ronaldo Aquino ngan tulo pa nga iba.
Hadin Biernes, an mga akusado in naka-agom hin “provisional liberty” tungod han ira pagpahamtang hin piyansa kay igintugot man ini han huwes, rason nga nakagawas hira tikang ha detention cell han CIDG-Region 8.
Ha interview han iFM-RMN Tacloban, mismo an abogado han mga akusado, Atty Levito Baligod, an nagsering nga puede mahibalik utro ha bilangguan an iya mga kliyente kun uyunan han huwes an iginsalawad nga motion for reconsideration han prosekusyon.
Hi Judge Maricar Lucero nga nag-inhibit na pagkapot han mga kaso, in sumugot nga makagpiyansa an mga akusado. Kataliwan hini, hi Atty Alma Uy-Lampasa, abogado han mga tagreklamo, in nagsampa hin mosyon nga igrekonsiderar han huwes an iya desisyon nga makagpiyansa an mga ginkasuhan.
Tungod kay ginbul-iwan naman ni Lucero an kaso, hi Judge Janet Cabalona han Calbiga Regional Trial Court an nagpagawas han Release Order katapos nga magpahamtang han piyansa an siyam nga akusado.
Nag-esplikar hi Baligod nga kun an bag-o nga magkakapot nga huwes han mga kaso in baligtaron an desisyon ni Lucero ngan umabuyon han motion for reconsideration han prosekusyon, puede bawi-on an piyansa ngan igbabalik ha karsel an gin-akusar nga mga indibiduwal.
Igindugang pa ni Baligod nga nahipapatik ha Constitutional Law nga puede pagawson ha karsel an mga akusado para han ira provisional liberty samtang gintitirutimbang pa han huwes an motion for reconsideration.
Dida gihapon han interview, igindig-on ni Baligod nga maluya an ebidensya han prosekusyon amo nga gintugutan nga makagpiyansa an iya mga kliyente.
Sering pa niya, dida han iginpresentar nga mga testigos durante han bail petition hearing, waray testigo nga nakakagtudlok ngan nakakakilala han iya mga kliyente nga amo an nanmusil ngadto han grupo ni Aquino.
An kontrobersyal nga mga kaso hin murder ngan frustrated murder in waray pa dumangat ha opisyal nga pagbista tungod han pagliwan-liwan hin mga huwes ngan mga mosyon tikang ha magkaluyo nga kampo.#
