Isumat.com/ Marso 21, 2023

Tungod han pag-abuso hin sekswal ha iya mismo anak ngan mga menor-de-edad, usa nga babaye nga taga Leyte in magseserbe hin sapin-sapin nga kapresuhan ha bug-os nga kinabuhi.

Ha report han Philippine Daily Inquirer, an Regional Trial Court ha Abuyog, Leyte in nakapamatood nga salaan an babaye dida han kaso nga sexual abuse ha mga menor-de-edad, upod an iya anak nga babaye kabalyo hin salapi tikang han iya mga parokyano ha on-line.

An korte in waray maghatag han ngaran ngan pangilal-an han akusado, labot la han pagsering nga hiya in taga MacArthur, Leyte. Kinahanglan maproteheran an dignidad han iya anak ug han iba pa nga biktima, sanglit waray igsumat an iya ngaran.

Ginsirutan hiya hin duha nga life sentence para han qualified trafficking ngan child abuse; ngan kadugangan nga 17 anyos nga kapreso tungod han on-line minor sexual exploitation. Iginmando gihapon han korte nga magmulta hiya hin 4.5 Milyones pesos para han tulo nga kaso.

Ini nga mga kaso in nag-ugat han ma-aresto ha Canada hi Philip Chicoine, usa nga Canadian nga nagbabayad ngadto han akusado para han salida han gin-aabuso nga mga menor pinaagi han on-line video.

Tungod hini, an mga otoridad ha Pilipinas in nag-imbestigar ngan gin-aresto an babaye hadton 2017. An akusado in na-aktuhan nga nag-o-opreser ha iya mga on-line costumer hin salida kun diin magbubuhat hiya hin malaw-ay ngadto han iya 7-anyos nga anak. An iya anak ngan walo pa nga kabataan in na-rescue han mga otoridad dida han operasyon.

Ini nga kakonbiktar han mao nga Leytena in nagpapakita nga magigin mabakod an mga pitad kontra han child sexual exploitatation kun nagbuburublig an mga nasud, sumala han International Justice Mission (IJM).

An IJM in usa nga non-government organization nga nakabase ha Amerika nga nagi-os kontra han mga grupo o indibiduwal nga nag-uuripon, naghihimo hin sexual assault, ngan Cybersex trafficking han kabataan.

Ha records han korte, hi Chocoine in nakagastos na hin sobra 20 Mil Canadian Dollars nga iya iginbayad para han mga salida hin child sexual abuse ha Pilipinas ngan Romania. Hadton 2017, an korte ha Canada in nagsirot kan Chocoine hin 15 anyos nga kapresuhan.#