Isumat.com/ Marso 22, 2023

Nag-aambisyon nga magin tinubyanan han balaud, hiya lugod an gin-aresto tungod han kaso nga pakasupak han Republika Akta 7610 o tinatawag nga Special Protection of Children against Child Abuse, Exploitation and Descrimination Act.

Ha report han PNP Regional Office, an akusado nga hi “Gabby”, 20 anyos, estudyante hin Criminology nga kurso, in nasikmit han kapulisan ha Brgy Atipolo, Naval, Biliran, hadton Marso 20, 2023.

Hiya in nag-uukoy ha Brgy Tabunan South, Almeria Biliran ngan numero kuatro ha talaan han most wanted persons ha ira munsipalidad.

An korte an nagpalusad han warrant of arrest ha kaso nga pakasupak han Section 5, Article 3 han mao nga balaud. Iginrekomandar han hukmanan an piyansa nga 200 Mil pesos basi temporaryo makagawas ha karsel an akusado.

An mao nga arrest warrant an nagin hinungdan han pagdumara hin operasyon han mga operatiba han Kawayan PNP ngan Biliran Provincial PNP Office ha pagdakop han akusado. #