Ha atubangan han krisis dara han COVID-19 ug han kanselasyon han mga boxing fights ha Las Vegas, nagtotoo la gihapon hi Manny Pacquiao nga madadayon an iya plano nga sumaka utro ha igbaw han ring hiton Hulyo.
Ha pagbanabana han fighting senator han Pilipinas, mahugpoy na an problema han corona virus ha sulod hin tulo ka bulan ngan dako an iya pagtoo nga deri ini makakabalaung han iya plano para han sunod nga away dida hito nga bulan.
Hi Pacman nga amo an World Boxing Association Association welterweight champion an ginkikita-kita nga igkaka-atbang kan 4-division king Mikey Garcia o deri ngani kan Errol Spence nga amo an hadi han IBF ngan WBC welterweight division.
An 32-anyos nga hi Garcia in may professional record nga 40 nga daug kun diin 30 an pinaagi hin KOs, ngan usa la an perde, samtang hi Spence, 30-anyos, in may kartada nga 26 nga daug, 21 pinaagi hin KOs ngan waray perde.
Ha luyo nga bahin, iginbabandera naman ni Pacquiao an iya record nga 62 wins, 7 losses ngan 2 draws. Dida han iya mga daug, 39 nga kaatbang an iya gin knockout.
Kun matuman ini nga hingyap ni Manny, sakto gud nga usa ka tuig an nag-agi tikang han iya katapusan nga fight kun diin iya pinerde hi hadto anay kampeon Keith Thurman ha Las Vegas. Hinungdan hini nga hilawig nga panahon nga diskanso o waray aktibidad hi Pacman ha boxing, mayda mga eksperto ha boksing in nagpahayag nga harani na iton paglusad han Pinoy boxing legend ha ring labi na nga 41-anyos na hiya. Sumala pa hini nga mga analyst, angay na maghunahuna hin pagretiro ha boxing hi Pacman kahuman hin usa o duha nga big-time fights basi mapreserbar an iya mahimsog nga panlawas.
Sering pa man han darahunon, waray pa atleta nga nakaperde han edad, pero sugad sugad nga waray pa ha bokabularyo han nag-uusaan la nga 8-division champion nga tapuson na an tele-nobela nga iya kinabuhi ha pakigbalyu-ay hin kamaoo. #
