Litrato han mga nagdaog han National Surfing Championships ha Borongan City, Eastern Samar.

Isumat.com/ Disyembre 6, 2022

Naghadi-hadi an mga beterano ngan banggiitan nga mga atleta dida han katatapos pala nga 3rd Leg han National Surfing Championships ha Borongan City, Eastern Samar.

Hi John Mark Tokong han Team Siargao amo an nagin kampeon ha Mens’ Shortboard Division, samtang hi Vea Estrallado han Sorsogon an nagin reyna han Womens Shortboard.

An taga La Union nga hi Marvin Abat an nanguna ha Mens Longboard ngan hi Aping Agudo han Siargao an gold medalist ha Womens Longboard.

An iba pa nga kampeon amo hira Rommel Rojo han Baler para han Masters Division, Toby Espejon han Siargao – Junior Division, ngan Graciella Miguellas han Siargao para han Girls Juniors.

Nagin malipayon an mga namagdaog kay tag 80 Mil pesos an nagin premyo para han mga first placers. Ini nga cash prizes in tikang han Probinsya han Eastern Samar pinaagi kan Gobernador Ben Evardone, CongW. Maria Fe Abunda han Lone District han probinsya, ngan City Government of Borongan ha panguna ni Mayor Jose Ivan Dayan Agda.

Nagpaka-angkon liwat hin mga cash prizes an nakatugpa ha ikaduha tobtob ikalima nga pwesto sugad man mga consolation prizes.

Sobra hin 200 nga mga surfers tikang ha magkalainlain nga parte han nasud an nagpartisipar han nasabi nga kompetisyon ha ilarum han superbisyon han United Philippine Surfing Association, ngan hul-os nga suporta han Philippine Olympic Committee ngan Philippine Sports Commission.

Ini an ikatulo nga higayon nga an Borongan City an nagpanagbalay han National Championships. Kasumpay hini, iginpatapod naman ni Agda nga magigin kada tuig na ini nga sporting event ha Borongan City.

Igin-esplikar han alkalde nga an syudad in manlilimbasog nga magkaada hin ordinansa para hini nga pagdumara hin kompetisyon basi masegurado nga matutuman ini kada tuig.

Ini nga kada tuig nga kompetisyon in ginlalauman nga makakapadukwag han ekonomiya ngan turismo nga sektor han Borongan sugad man an bug-os nga probinsya.

Labot la han surfing tournament, nagkamay-ada gihapon hin Surf City Trade Fair kun diin an lokal nga mga prudukto han probinsya an iginpasundayag ngan iginbaligya ngadto han publiko ngan ha mga partisipante han torneo.# (via Borongan City Info Office)