Isumat.com/ Disyembre 6, 2022
17 katawo na ha Sinirangan Bisayas an naawat an kinabuhi yana nga tuig tungod han sakit nga dengue katapos la nga may nahidugang nga duha nga biktima dida han nakalabay nga pira ka adlaw.
Ini an iginbuyagyag ni DOH Regional Office Information Officer Jelyn Malibago, dungan han iya makusog nga panawagan ha publiko nga deri gud magpasibaya kontra han makamaratay nga sakit.
Dida hini nga nagkamamatay, 9 in tikang ha Southern Leyte, tulo ha Leyte, tulo ha Eastern Samar ngan duha ha Samar.
Ha gibabag-uhi nga report han DOH, umabot na ha 6,089 an kaso hin dengue ha rehiyon ngan ini in nakaka-alarma kay hadton 2021, sobra la ini hin 700 an kaso.
An Leyte in nagkaada na hin 2595 nga kaso, Southern Leyte 1454, Samar 625, Eastern Samar 575, Biliran 548 ngan Samar 300.
Kasumpay hini, an DOH in nagduduso nga gamiton an pangontra ha dengue nga 4S, bootsidngon Search and destroy mosquito breeding places, Seek Early Consultation, Secure self-protection, Support Fogging/Spraying.(via Elmer Recuerdo/Daily Tribune)
