Isumat.com/Oktubre 4, 2022

Nalahiran hin dugo hin magturutdo an pagtigaman han World Teachers Day tungod han pagbun-a ngan kamatay hin maestro ha Basey, Samar kakulop, Oktubre 3, 2022 kun diin usa nga estudyante an suspetsado han krimen.

Ha report han PNP Regional Office, ginkilala an biktima nga hi George Lauron, 32 anyos, waray asawa, Senior High School teacher ha Basey National High School. Hiya in residente han Brgy San Isidro, Paranas, Samar.

An suspetsado in ginkilala han kapulisan nga hi Kurt Lancanan, 19 anyos, nag-uukoy ha Brgy Lawaan, Basey, Samar. Hiya in Senior High School student hin eskwelahan ha Tacloban City, pahayag han imbestigador han Basey PNP.

Iginpapakita han imbestigasyon nga natabo an insidente pasado alas 5 han maagahon, Oktubre 3, 2022. Hira Lauron, Lancanan ngan usa nga indibiduwal ha ngaran kan Doydoy Ecalne in nag-irignom ha boarding house han biktima ha Brgy Sulod han mao nga bungto.

Subay han pahayag han imbestigador, samtang segi an tagay-tagay, nagkaada hin mapaso nga argumento ha butnga han biktima ngan suspetsado. Nahangit an gintatahapan ngan ginbuno ha dughan nga parte han iya lawas an biktima.

Kadagmitan gindara ha Basey District Hospital an maestro pero igindeklarar nga dead on arrival han mga doktor.

Ha luyo nga bahin, an suspetsado in bolontaryo nagsurender ha Basey PNP ngan hiya in nakatalaan umatubang han kaso nga igsasalawad kontra ha iya. Waray pa igpahayag han report an posible nga motibo han krimen samtang ginsusurat ini nga notisya. #