Isumat.com/Oktubre 6, 2022
Naghihimo hin marathon hearings an Regional Trial Court Branch 31 ha Calbayog City basi maresolbar an petisyon nga makag-piyansa an mga akusado han pagpatay kan anay Calbayog City Mayor Ronald Aquino ngan tulo pa nga iba.
Kakulop, Oktubre 6, 2022 hi RTC Judge Reynaldo Clemens in nagtikang han proseso basi pamati-an ngan pagtirutimbangon an mga argumento han magkaluyo nga panig. Sumala han report tikang ha Calbayog, igintalaan an marathon hearings tobtob ha bulan han Nobyembre 2022.
Kun aton manunumduman, siyam nga anay opisyales han Philippine National Police an ginsampaan hin mga kaso nga upat ka ihap hin murder ngan frustrated murder kasumpay han madugo nga insidente natabo hadin nakalabay nga tuig kun diin namatay hi Aquino ngan tulo han iya kaupdanan ngan kasamad hin usa pa katawo..
An kampo han mga akusado in nagkikitakita nga maluya an ebidensya kontra ha ira, sanglit nagsampa hira hin petition to bail ha panuyo nga tugutan makagpiyansa han korte basi makagawas hin temporaryo ha karsel.
Hi Atty Levito Baligod, abogado han mga akusado, in nagpahayag nga aada na ha mga kamot han korte kun uuyunan an ira petisyon.
Ginseguro naman ni Atty Alma UY, abogado han mga biktima, nga makusog ngan supiseyente an ira ebidensya ngan mga testemonya han testigos basi igbasura han hukmanan an petisyon.
Ha iya panig, iginpatapod naman han huwes nga magigin patas hiya ha pagtagad hini nga petisyon. Waray niya papaboran dida hini nga kontrobersyal nga kaso, pahayag pa han hukom.
Iginsumat gihapon ni Judge Clemens nga an mga akusado in nag petisyon nga igbalhin hin venue an pagbista han kaso, pero ini in waray tuguti han korte suprema.
Sumala kan Clemens, ini nga desisyon han korte suprema in klaro nga senyales nga an Supreme Court in hul-os an pagtapod nga magigin patas ngan waray kikilingan an korte ha Calbayog.
An mga akusado amo hira Police LtCol Harry Sucayre, Maj Shyrille Tan, Capt Dino Goles, Lt Julio Armeza Jr, Sgt Neil Cebu, Sgt Edsel Omega, Sgt Randy Merelos, Cpl Julius Garcia ngan Patrolman Nino Salem.
Ha panmaki-ana han IsumatNews ha iba nga abogado, an murder in non-bailable nga krimen, pero an mga akusado in may katungod pag petisyon nga makagpiyansa kun ha ira pagkita maluya an ebidensya. Denhi ha Pilipinas, an sugad hini nga petisyon in talagsa la uyunan han huwes, pero mayda liwat pirapira nga kaso nga gintutugutan han korte.# (w/ reports from Samar Daily News On Line)
