Isumat.com/ Disyembre 5, 2022

Nag-utod han ira tagsatagsa nga kinabuhi in usa nga lalaki ngan usa nga babaye ha magkalain nga insidente kun diin ginbabanabana nga problema ha paghigugma an nagin hinungdan.

Ha Brgy Sto Nino, Mahaplag, Leyte natad-an nga nabitay an patay nga lawas han biktima nga hi Pablo Apiag Jr, 21 anyos, estudyante, ngan naukoy han nasabi nga lugar.

An insidente in nadiskubre alas 11 han gab-i hadton Sabado, Disyembre 3, 2022.

Ha inisyal nga imbestigasyon, antis an panhitabo, an biktima ug an iya girlfriend in nagkabalingkutay ha video call, ngan ha katapusan nga mensahe ha cellphone nagsering an biktima ha iya oyab nga “Kitaa ko magpakamatay.”

Gintalinguha nga madara ha hospital an biktima pero igindeklarar han doktor nga dead on arrival.

Ha luyo nga bahin, hi Rosemarie Agravante, 20 anyos, waray asawa ngan residente han Brgy Casandig, Gandara, Samar in gin-alegar nga nag-suicide pinaagi han pagbitay han iya kalugaringon hadton kulop han Disyembre 4, 2022.

Ha imbestigasyon, nagawas nga an biktima in nag-aantos hin emotional depression han iya mabuksot nga mayda ka-relasyon nga iba nga babaye an iya boyfriend.

An biktima in gindeklarar nga Dead on arrival didto ha Gandara District Hospital. #