Isumat.com/ Disyembre 5, 2022
Bisan waray amot o kontribusyon, puede umapi in usa nga pupil o estudyante ha Christmas Parties nga hihimoon ha mga eskwelahan yana nga panahon han Kapaskuhan, sumala han Department of Education.
Ha ilarum han kamanduan han ahensya nga iginpagawas hadin Disyembre 2, 2022, deri pipiriton pag-amot an mga estudyante para han party ngan kinahanglan paapihon han karisyuhan bisan waray umamot ngan waray pan exchange gift.
Igindig-on han DepEd nga kinahanglan simple la ngan deri garboso an katitirok labi na makuri an kabutangan yana han nasud.
Iginmamando gihapon para han mga personales han DepEd nga deri hira mag-ginastuson han ira kalugaringon kwarta ngan deri mag-solicit ha iba nga tawo o grupo para gamiton ha party.
Kinahanglan deri magin sakripisyo para han mga kag-anak, kabataan ngan DepEd personnel an party sanglit deri angay magpanunubra an gastos.
Gin-aaghat gihapon han ahensya nga deri pumalit hin bag-o nga dekorasyon ha mga eskwelahan ngan ig-recycle nala an mga materyales nga puede mahimo nga dekorasyon. #
