Isumatcom/ Disyembre 5, 2022

Bisan gud diin nga kompetisyon nga iya pag-apihan, makakaglaum gud nga magkokolekta hin mga medalya an taga Matag-ob, Leyte nga hi Veronica “Nica” Ompod.

Hi Nica in naka-angkon hin upat nga Gold medals han katatapos pala nga 2022 Asian Classic Powerlifting Championships ha Dubai, United Arab Emirates.

Hiya an nagin kampeon han masunod nga kategorya ha Womens’ Junior: 110kg ha Squat nga amo in bag-o nga Asian Jr record, southeast record ngan Philippine record; Benchpress 52.5kg, nga bag-o liwat nga SEA ngan Philippines Jr record; Deadlift 115kg; ug an total 277.5kg nga bag-o liwat nga Asian, Sea ngan Phil jr record.

Ini nga kompetisyon in ginpartisiparan han mga powerlifters tikang hin 15 nga nasud ha Asia.

Hadin nag-agi nga mga tuig, hi Ompog in nagbibit na hin mga medalya ha mga international competitions sugad han 2015 World Classic ha Texas, USA; 2019 Worlds ha Canada ngan Calgary; national competitions ngan kadam-an pa nga torneo.

Hiya in estudyante hin criminlogy ha Jose Rizal University. Antis hiya pumakadto ha Manila, hi Nica in usa han mga prudukto han Leyte Sports Academy kun diin umapi hiya ha Palarong Pambansa.#