Isumat.com/8:02AM, July 02, 2020
Kun an iba nga pampubliko nga eskwelahan haros manginyupo na ha mga estudyante nga magpa-enroll kay kulang pa an nagparehistro, tarihas naman an kahimtang ha Leyte National High School (LNHS) ha Tacloban.
Ini in dara kay lumapos na han ira target an nagpalista nga ma-eskwela. Sumala han tagyakan han LNHS ngahi Bernie Lamograr, an ira target in Otso Mil la nga estudyante tikang ha First Year tobtob ha Senior High, pero tobtob han Hunyo 30, umabot na ini hin 10 Mil.
Nagsering hi Lamograr ini in dara han ira paningkamot han pagpa-rehistro pinaagi han On-Line Enrollment sugad man han koordinasyon ha magkalainlain nga barangay han syudad nga bumulig han pagpa-rehistro kay deri man nagpapakagawas an mga batan-on tungod han lockdown han COVID-19.
Usa gihapon han rason kun kay-ano nga nagtikadamo an nagpalista ha LNHS amo an pagdesisyon hin kadam-an nga pamilya nga an ira mga anak igbalhin tikang hin pribado nga eskwelahan ngadto ha LNHS, dugang pa ni Lamograr.
Sumala han pahayag han mga kag-anak, kinahanglan mag-imit-imit hin kwarta labi na kay may krisis ngan parehas manla an na-aangkon nga kina-adman ha pribado ngan gobyerno nga panutdu-an.
Iginpatapod naman han liderato han LNHS nga bisan kun nagtikadamo an estudyante, bastante an ira mga classrooms ingkaso magkaada hin face-to-face nga pag-eskwela.
Ginseguro gihapon han LNHS nga andam hira han mga paagi han pagtutdo kun deri pasudlon ha eskwelahan an kabataan tungod han peligro han corona virus. # (KEVIN SIOSANA)
