Isumat.com/Hunyo 5, 2023
Garantisado nga deri makakalimtan han mga makakasaksi an maribhong ngan mabaysay nga mga aktibidadis han pagdudumaraon nga Kananga Kaanyag Festival hiton Hunyo 7 – 11 didto ha Kananga, Leyte.
An LGU-Kananga ha panguna ni Mayor Matt Torres, in nagsegurado nga an lima ka adlaw nga engrande nga mga pasalida in magpapasundayag han rikohanon nga kultura han bungto.
Titikangan an mga aktibidadis hiton Hunyo 7 pinaagi hin Santos nga Misa alas 4 han kulop, ngan susundan ini han presentasyon han mag-anyag nga mga Festival Queens.
Hiton Hunyo 8, bubuhaton an Grand Ylang-Ylang Tree Planting, kun diin magseserbe ini nga paghatag hin pagkilala han kamabaysay ngan importansya han bukad nga ylang-ylang ha kasaysayan han Kananga.
Pagka Hunyo 9, hihimoon naman an Beauty & Wellness nga mga aktibidad kun diin panuyo an pagka-ada hin mahimsog nga panlawas. Dida hini nga adlaw, magkakamay-ada hin beauty and personality workshop sugad man zumba session.
Magarbo ngan puno hin karisyo nga sarayaw an maaguman han publiko hiton Hunyo 10 han gab-i, tinatawag ini nga Music & Disco Wonderland. Magpapakita han ira talento ha musika an bantuganan nga mga DJs ngan mga banda, nga segurado waray kakapoy nga pagsayaw an igdudurot ha mga partisipante.
An Grand Finale han festival in matatabo Hunyo 11 kun diin igpapasundayag an mga talento ngan talagsaon la nga kirita-on. Mga garboso nga karosa an makikit-an ha parada, inupdan han street dancers performers.
Dida gihapon hini nga adlaw an koronasyon han mapipili nga Reyna han Festival. Ini nga magigin Festival Queen an ighahatag ha kandidata nga makakagpakita han ladawan han kultura ngan tradisyon han Kananga.
Pagkagab-i han Hunyo 11, masasaksihan an Grand Ritual Showdown nga sering pa man han tag-organisar nga “astonishing spectacle of traditional performances and cultural rituals that will leave spectators in complete awe.”
Hi Mayor Torres in kinasingkasing an pagkumbida ha ngatanan nga pumasyada ha Kananga para han Kaanyag Festival kay segurado nga makukuntento ngan maruruyagan an igin-andam nga mga kiritaon ngan personal nga aabaton han mga bisita an pamatasan, tradisyon ngan kultura han ira munsipalidad. #
