Leyte 4th District Congressman Richard Gomez ngan Isabel, Leyte Mayor Edgardo Cordeno.

Isumat.com/Hunyo 6, 2023

Magharang nga mga pamulong an iginpilak nira 4th Leyte District Congressman Richard “Goma” Gomez ngan Isabel, Leyte Mayor Edgardo “Dodo” Cordeno kontra ha tagsatagsa mahitungod han natabo nga buy-bust operation ha bungto han alkalde kun diin duha nga drug suspects an namatay ngan dako nga kantidad hin droga an narekupo.

Kun manunumduman, nagkaada hin anti-illegal drugs operation an kapulisan hadin Hunyo 4, 2023 ha Brgy Apale, Isabel ngan namatay an duha nga suspetsado nga hira Zaidamen Langco ngan Abdula Ismael nga gin-aalegar umato ha mga otoridad. Narekupo han mga tinubyanan hin balaud an droga nga balor hin 782, 000 pesos.

Pagka Hunyo 5, 2023, hi Gomez in nagpahayag han iya pagdayaw ha kapulisan tungod han malinangpuson nga operasyon ngan iginsaad han magbabalaud nga deri hira maundang han kampanya kontra iligal nga droga ngan tanan nga iligal nga aktibidadis. Nagsering pa hiya nga kinahanglan magburublig an ngatanan para han kamurayawan han distrito.

Dida han nasabi nga post ha faceook, nagsering pa hi Goma nga samtang nagkikinaturog an mayor han Isabel, an kapulisan in nasasagipo pandakop hin drug pushers.

Ini nga pahayag han congresista in deri maupay an pagkarawat ni Cordeno. Sumala kan Mayor Dodo, malisyoso an pasamwak ni Gomez nga nagkikinaturog la hiya samtang naghihimo hin operasyon kontra droga an mga kapulisan ha iya bungto.

Sering ni Cordeno, iresponsable an pahayag ni Gomez ngan iya gin-aghat an kongresista nga deri mamulitika yana nga mga takna.

Ginklaro han alkalde nga maaram hiya han operasyon ngan mayda niya koordinasyon ha mga otoridad samtang nagkakaada hin operasyon.

Igindig-on pa ni Cordeno nga an tanan nga iligal nga aktibidadis in waray lugar ha ira munisipalidad. Sering pa niya, deri hira mahunong ngan waray nira ginkakahadlukan ha ira mga pitad kontra han mga iligalista.

An bungto han Isabel in sakop han ika-upat nga distrito han Leyte. An iba pa nga lugar nga api han distrito amo an Ormoc City, Palompon, Matag-ob, Kananga, Merida ngan Albuera. #