Isumat.com/9:15AM,July 8, 2020
Bisan ha panahon han pandemya han COVID-19, deri ginsasalikway han kapulisan an ira obligasyon kontra han krimen labi na gud an kampanya pagsupil han iligal nga droga. Ini an ginklaro ni Col. Bella Rentuaya, tagpamulong han PNP Regional Office.
Ini an reaksyon han opisyal kasumpay han nagsusunod-sunod nga pagkadadakop han mga suspetsado pagbaligya han illegal drugs. An iba nga suspetsado in nagkamamatay dara han alegasyon nga umato han mga otoridad.
Igindig-on ni Rentuaya nga bisan kun nasasagipo hira han pagmentenar han kamurayawan ngan mga checkpoints, padayon an mahugot nga paghalpat han mga drug suspects.
Iya pa ginklaro nga waray milagro han ira ginbubuhat nga mga pandakop kay ini in tikang hin impormasyon han katawhan ngan barangay officials ngan maiha nga panahon hin pagmanman basi maseguro nga deri hira magsasayop pagdakop han mga suspetsado.
Waray gihapon pressure ngadto han mga PNP Municipal Office nga kinahanglan makadakop kay bangin magpinandakop la bisan waray kalabutan ha droga an mga gin-aaresto, pagklaro pa ni Rentuaya. An accomplishment in basar han beripikado nga mga impormasyon, ngan waray baratunon an mga PNP officials kun waray nadadakop ha ira lugar kun waray man aktibidad dida han ira nasasakupan.
Ginseguro naman ni Rentuaya nga ginsusunod han mga operatiba han PNP an mga health protocols basi makalikay hira nga matapnan han corona virus ha ira gindudumara nga mga operasyon. #
