Isumat.com/Agosto 8, 2022
Nabungkag in usa nga drug den ngan nagkadadakop in tulo katawo dida han gindumara nga anti-illegal drugs operation han mga tinubyanan han balaud ha Brgy Sta Cruz, isabel, Leyte hadton Agosto 5, 2022.
Ha report han PDEA-Regional Office, ginkilala an mga suspetsado nga hira Angel Pateros, an gin-aalegar nga nagpapadalagan han drug den; ug an iya mga bisita hadto nga takna nga hira Lucas Canonigo ngan RR Canonigo.
Nakumpiskar tikang han mga gintatahapan an shabu may timbang nga 15.22 gramos ngan may kantidad nga 103,550 pesos.
Ini nga operasyon in gindumara han mga personales han PDEA, Leyte PNP, ngan Isabel Leyte PNP alas 7:35 han gab-i hadto nga petsa.
Samtang, usa naman nga drug personality an na-aresto ha Brgy Zone 10, Baybay City pasado alas 3 han kulop hadton Agosto 6, 2022.
Ginkilala an suspetsado nga hi John Harris Omega, usa nga High Value Target.
Narekupo dida han buy-bust operation tikang kan Omega in unom ka sachet hin shabu may kabug-aton nga 55.46 gramos, balor hin 377,163 pesos.
An mga suspetsado han magkalain nga insidente in maatubang han kaangayan nga mga kaso tungod han ira pakasupak han balaud kontra han iligal nga droga. #
