BGen Rommel Francisco Marbil. (Photo courtesy)

Isumat.com/Agosto 10, 2022

Hi Brig General Rommel Francisco Marbil an bag-o nga magigin lider han pwersa han kapulisan ha Sinirangan Bisayas.

Kakulop, Agosto 9, 2022, an PNP General Headquarters ha Campo Crame an nagpasamwak han pagtudlok ngan pagbarubaraha hin maabot 70 nga Senior Officials han PNP ngadto han ira bag-o nga mga posisyon.

Hi Marbil nga amo yana an Highway Patrol Group (HPG) Commander in magigin bag-o nga PNP- Region 8 Director ngan iya liliwanan hi BGen Bernard Banac.

Hi Marbil in kaapi han Phulippine Military Academy (PMA) Class of 1991. Nagkapot hiya hin magkalainlain nga pwesto ha PNP lakip na denhi an pagigin Provincial Director ha Agusan Del Norte ngan Chief of Staff han PNP Civil Security Group.

Ha luyo nga bahin, hi Banac in igbabalhin naman tikang denhi ha Rehiyon Otso ngadto ha PNP Directorate for Plans ha Campo Crame. Hi Banac in nagserbe ha Eastern Visayas tikang han Pebrero 2022.

Tobtob han ginsusurat ini nga notisya, waray pa petsa nga igintalaan para han pormal nga pagtubyan han liderato han PNP-Region 8 tikang kan Banac ngadto kan Marbil.

Samtang, apektado gihapon han revamp an Leyteno nga opisyal ngahi BGen Arthur Cabalona. Hi Cabalona nga amo yana an Regional Director han BangsaMoro Autonomous Region an natudlok komo bag-o nga Deputy Commander han PNP Eastern Mindanao Area Command.#