Isumat.com/Agosto 8, 2022
Napi-angan na liwat an pwersa han terorista nga New Peoples’ Army han maawat an kinabuhi han duha nga ira opisyal ha asdangay kontra han mga tropa han gobyerno hadton Agosto 1, 2022 ha San Jose De Buan, Samar.
Ha report nga iginpagawas han 8th Infantry Division han Philippine Army, ginkilala an namatay nga mga rebelde nga hira Rodrigo Mejica Lorezo alas Akag, 60 anyos; ngan hi Delia Rosco Rotalano alyas Mema, 58 anyos. An duha in nagkakapot hin mga posisyon ha Eastern Visayas Regional Party Committee han CPP-NPA-NDF.
Hadto nga petsa, an mga otoridad in nakakarawat hin impormasyon mahitungod han presensya hin armado nga mga terorista nga rebelde ha Brgy Hilumot, San Jose De Buan. Kadagmitan nag-organisar hin patrol group an mga otoridad pinaagi han mga personales tikang ha Philippine Army ngan kapulisan tikang ha Regional Mobile Force Group.
Samtang tipakadto han lugar an mga tropa han gobyerno, ginpa-arakan hira hin bala hin porlomenos unom nga mga rebelde. Hinungdan hini, bumulos pagpabuto an mga sundalo ngan kapulisan.
Katapos han 10-minutos nga pupsilay, umiskapo an mga rebelde han ira makit-an nga duha han ira kaupdanan an naigo hin bala ngan ira ini ginbayaan. Waray naman nahireport nga samaran o namatay ha panig han pwersa han gobyerno.
Labot la han kamatay nira Lorezo ngan Rotalano, narekupo gihapon han mga otoridad dida han lugar han agway in usa nga M-16 rifle, usa nga kalibre 45, laptop bag may sulod nga subersibo nga mga papeles, personal nga mga higamit ngan tulo nga magazines hin bala.
An mga patay nga lawas han mga rebelde in gindara ngadto han bungto ngan gintagan hin desente nga paglubong kataliwan han post-mortem examination ngan pagkilala ha ira.
Kasumpay hini, hi 801st Brigade Commander Col Lenart Lelina in nanawagan ha mga rebelde nga adto pa ha kabubkiran nga umundang na han waray hangkag nga ira pakigbisog, lugod bumalik ha piyod han balaud labi na nga andam an gobyerno pagkarawat ha ira ngan katagan han oportunidad nga mabuhi hin mamurayaw upod an ira tagsatagsa nga pamilya.
Gindayaw gihapon ni Lelina an mga tropa han gobyerno tungod han malinangpuson nga operasyon kun diin ira iginbutang ha peligro an ira kinabuhi para ma-angkon an gintitinguha nga dayuday nga kamurayawan.#
