Gintawag nga mga bayani yana nga mga panahon dara han ira pagbutang ha kadelikaduhan han ira kinabuhi ha pagtambal han mga magsakit, pero gin-iilob ngan gin-aantos han mga health workers denhi ha Tacloban City ngan paghagrani nga lugar an deskreminasyon tikang hin pira nga mga tawo ngan establesimento.
Ha usa nga interview han taga media, iginpahayag ni Dr. Lory Ruetas, Media Relations Officer han Eastern Visayas Regional Medical Center (EVRMC), pira nga ira personales in naka-eskeperiensya hin deskriminasyon, ug an grabe pa hini, bisan mismo an mga tawo nga nakilala ha ira, alagid-agid hin deri na makatawo an pag-tratar ha ira.
Iginsumat han doktor nga may departamento ha EVRMC an nag-order hin pagkaon pinaagi hin pagtawag ha telepono, pero waray sumugot an restaurant ha rason nga nahadlok daw an magdedeliver han pagkaon.
Usa gihapon nga nagtatrabaho ha hospital an napiritan pagbalhin hin boarding house tungod nga malain na an pagtagad han iya landlord. Mayda gihapon usa nga health worker in waray na pababalika anay ha ira bungto tungod kay nahadlok daw an iya mga kababayan nga matapnan han COVID-19.
Kun may deskriminasyon han health personnel ha government hospitals, amo gihapon an gin-aantos hin mga medical workers ha pribado nga mga hospital ha Tacloban. Sumala hin usa nga nurse nga iginka-istorya han isumat.com, hiya mismo ug an iya mga ka trabaho in usahay deri ginpapasakay ha pampubliko nga sarakyan. Mayda liwat mga tawo nga gindidid-an hira pag-agi han kalsada kun diin malalabyan an kabablayan hini nga mga reklamador.
Igin-asoy gihapon han nurse nga mayda usa nga tindahan nga gintabog hiya ngan waray hiya papalita hin pandesal.
Ura-ura an kabido hini nga health workers, labi na ha private hospitals kay katunga nala ngani an ira sweldo nga ira nakakarawat tungod kay skeletal work force la hira, naatubang pa hira hin peligro kay hira an nagtitimangno han magsakit, ngan amo pa ini an pagtratar han iba ha ira.
Kun aton manunumduman, usa nga nagtatrabaho hin hospital ha Sultan Kudarat an ginsabligan hin bleaching liquid hin kalalakin-an han umagi hiya ha usa nga tindahan. Ini nga biktima in posible mabuta kay nasabligan han bleach an iya mata.
Nanawagan na an Department of Health ha publiko nga intindihon an trabaho han mga health workers labi na yana nga mga panahon. Ginklaro han DOH nga kun nagawas ha hospital ini nga mga personnel, ira ginseseguro nga hapsay an pag-disinfect ha ira ngan maaram mismo hira kun ano an angay buhaton ha gawas han hospital basi deri makahatag hin kadelikaduhan ha igkasitawo. #
(Posted 8:30 AM, March 31, 2020)
