Isumat.com/8:43AM, August 20, 2020
Magtitikang yana nga adlaw, Agosto 20, an pagbiyahe na liwat han mga Locally Stranded Individuals tikang ha Metro Manila ngan iba nga parte han Luzon tikadto ha magkalainlain nga parte han Mindanao ngan Visayas lakip na an Region 8. Ini in pinaagi han programa nga Hatid Tulong Initiative han gobyerno.
Nagsering an Presidential Management Staff (PMS) nga yana nga adlaw porlomenos 70 an mga LSI nga taga Region 8 an malakat ha Manila.
ini nga programa han gobyerno in pinaagi han panlimbasog han Office of the President, Senador Bong Go, DSWD ngan Department of Transportation.
Nagpatapod an PMS nga deri na mapaparehas hadto nga nagbugi-ot ha Rizal Sports Complex an mga LSI nga magkaka-uli. Yana mayda na limitasyon kun pira la ka tawo an igintutugot han mga LGU nga puede makasulod ha ira.
Labot la han mga LSI tikang ha Manila ngan Luzon, duha na ka semana nga nagkikina-abot an mga LSI tikang ha Cebu nganhi ha Eastern Visayas katapos la nga igpailarum ha General Community Quarantine an Cebu.
Haros kada adlaw, mayda liwat nagkaka-abot nga mga OFWs pinaagi han mga eroplano nga natugpa ha Tacloban Airport.
Pira nga mga LGUs denhi ha Sinirangan Bisayas an naghangyo ha National Inter-Agency Task Force nga deri la anay hira makarawat hin mga LSI kay puno na an mga Quarantine ngan Isolation Facilities. #
